SAKAPUE SIRIEH
Assallamu’alaikum Wr,Wb
Dengan
bismillah kato di mulai semoga Allah maredhoi,,
Manuruik pepatah dinan tuo sarato
ajaran guru-guru, Allah basifat qadim manusia basifat khilaf dengan salah, kok
tumbueh di diri kami nanko manarueh kilaf dengan salah takatokan kato nan tak
bana mako tobat ampunan lah kami kapado Allah maaf kapado angku-angku usah di
agieh kami badoso.
Malinteh kami dinan rapek mangirai kami
dinan rami, antah tasabuik dinan iyo antah tabaco dinan bukan sapanjang galah
bajuluek kan, manguak buah dinan rimbun kami manati mintak kameh.
Dek gamang tangan gumanta dek rusueh
mato tacelang, dalam malembai atah
pinukuik talenggang atah masuek dadak tolong dek anggku mamiliehkan nak jan
malu kami di lasuang.
Nan sakah bulieh di rautan ibarek daun
kayu anyuik, sapantun awan di udaro indak tantu arah jo padoman. Kurang
pandapek nan bak sikek kurang luruihnyo bak kalawang indak jalan nan batampueh Antah di asak kurang isi antah di
banieh nan tak sampai.
Tantangan tutue dengan kato, erieng
dengan gendieng, kok indak tapakaikan tampan jo taratik - lelo jo kurenah,
manembak indak ka alamaik malantiang indak kanai tampuek - bakato indak dinan bana rila jo maaf kami
mintak.
Jo salam sambah di anjuang ka hadapan
niniek dengan mamak, pasan nan barek kami jujuang ma anggkek adat jan ta injak.
Sado nan dapek kami sambah kan – nan tingga untuek rang nan pandai, sunggueh
beko maju nyo zaman adaik kito jan sampai hilang.
Sakian sakapue sirieh dari kami silang
nan bapangka karajo nan bapokok-sambah jo salam kami sampaikan ka ganti sirieh
nan sakapue ka ganti rokok nan sabatang pa uba banang ampie lapuek.
Wabillahi taufik Walhidayah,
Assallamu’alaikum Wr, Wb
